د افغانستان په سویل ختیځو ولایتونو کې د امیدواري پر مهال د پاملرنو د لاس ته راوړلو پر وړاندې خنډونه
کلیدي کلمې: د امیدواري پرمهال پاملرنې، د زیږون نه مخکې پاملرنې، سوېل ختیځه سیمه، خنډونه، د میندو روغتیا
شريف احمد حبيب احمدزی
لنډیز
د امیدواري پر مهال پاملرنې امیدوارو میندو ته د مور او راتلونکي ماشوم دواړو روغتیا او خوندیتوب باوري کوي. دا پاملرنې هغه وخت ګټورې دي چې با کیفیته او جامع وي، د امیدواري په لومړیو کې او هره میاشت تکراري تر لاسه شي . که څه هم افغانستان کې د امیدواري پرمهال پاملرنې په وړیا ډول وړاندې کیږي خو د دې پاملرنو څخه د ګټې اخیستنې کچه ډیره ټیټه ده. د امیدواري پرمهال د روغیتايي پاملرنو څخه د ګتې اخیستنې په وړاندې شته خنډونه پیژندل او حل لارې يې پر ګوته کول د روغتیايي مدیرانو، پریکړه کوونکو او نورو دخیلو خواوو سره مرسته کوي چې د وضعیت د ښه والي لپاره د حل لارو عملي پلان جوړ کړي تر څو ورته د ټولو میندو لاسرسی ډیر، ګټه اخیستنه یې دود او د مور او ماشوم د مړینې کچې راټیټې شي. په دې څیړنه کې د ۱۶۵۴ امیدوارو میندو د معلوماتو تحلیل دا څرګنده کړه چې په سوېل ختیځو ولایتونو کې د امیدواري پرمهال د پاملرنو څخه ګټه اخیستنې کچه ۴۸،۹٪ ده او په وړاندې یې عمده خنډونه ترانسپورتي ستونزې، د میندو لخوا دا فکر چې د پاملرنو د اړتیا نشتوالی، لیرې والی، د دود نشتولی، د پیسو نشتوالی، د ښځینه روغتیايی کارکوونکو نشتوالی یاد کړي وو.
