د علمي شورا په اړه

د ملي پوهنتون علمي شورا د دې پوهنتون تر ټولو لوړه اکاډمیکه مرجع ده، چې په کې د ډیپارتمنتونو، د پوهنځیو شوراګانو، د تقرر او انفکاک کمېټو، علمي ترفیعاتو او همدارنګه د علمي پالیسيو، پلانونو او څېړنیزو لارښوونو اړوند ټول علمي او تخصصي موضوعات تر بحث، ارزونې او پرېکړې لاندې نیول کېږي، دغه شورا د پوهنتون د علمي فعالیتونو په لوري ورکولو او د اکاډمیک کیفیت په تضمین کې اساسي رول لري.

د ملي پوهنتون علمي شورا د پوهنتون د رئیس په مشري جوړېږي، چې په کې علمي مرستیال د شورا د مرستیال په توګه، د استادانو آمر د منشي په توګه، د مالي او اداري چارو مرستیال، د محصلانو چارو مرستیال، د تحقیق او علمي مجلې رئیس، د پوهنځیو رئیسان او له هر پوهنځي څخه دوه تنه د علمي صلاحیت لرونکي استادان د دې شورا غړي دي.

د دې شورا له اساسي دندو څخه: د تحصیلي او څېړنیزو پالیسيو طرح او ترتیب او اړوندو مراجعو (د لوړو زده‌کړو وزارت/ د امنا هیئت) ته د هغو وړاندې کول، د علمي پروګرامونو د دوراني بیاکتنې اړوند وړاندیزونو ارزونه او تصویب، د څېړنیزو پلانونو ارزونه او د هغوی د اغېزمن تطبیق لپاره لازمې لارښوونې وړاندې کول او همدارنګه د علمي بدلونونو او نویو اړتیاوو په نظر کې نیولو سره د تقنیني اسنادو د طرح یا تعدیل وړاندیز شامل دي.

همدارنګه، دا شورا صلاحیت لري چې د پوهنځیو، ډیپارتمنتونو او علمي پروګرامونو د تأسیس، پراختیا، ادغام یا انحلال په اړه پرېکړې وکړي او اړوند وړاندیزونه وړاندې کړي، له لیسانس څخه پورته تحصیلي پروګرامونو او تخصصي کورسونو طرح او وړاندیز، علمي ظرفیت‌لوړونه، د علمي کادر د غړو د تقرر، انفکاک او تقاعد ارزونه او تصویب، د لوړو زده‌کړو وزارت د معیارونو پر بنسټ د علمي رتبو تثبیت او د علمي ترفیعاتو ارزونه د دې شورا له مهمو مسؤلیتونو څخه دي.

د ملي پوهنتون د علمي شورا پرېکړې په رسمي ډول د غونډو په کتاب کې د پروتوکول شمېرې او نېټې په ذکر سره ثبت او په لنډ وخت کې اړوندو مراجعو ته ابلاغ کېږي، تر څو د هغو د اغېزناک تطبیق زمینه برابره شي.