د اداري او مالي معاونيت په اړه
د لوړو زدهکړو وزارت د مقرراتو او اداري معيارونو له مخې، په هر پوهنتون کې اداري او مالي چارې د يو منظم جوړښت له لارې تنظيمېږي، څو د علمي بهير ملاتړ، مالي شفافيت او د خدمتونو موثريت تضمين شي، په همدې چوکاټ کې، اداري او مالي معاونيت د پوهنتون له اساسي اداري واحدونو څخه دی چې د مالي، اداري او خدماتي چارو رهبري او نظارت پر غاړه لري.
اداري او مالي مرستيال د پوهنتون د رهبرۍ د ټيم مهم غړی دی او د بوديجې د طرح او تطبيق، مالي مديريت، تدارکاتو، بشري سرچينو، معلوماتي ټکنالوژۍ، ډیټابېس، عوايدو او نورو اړوندو څانګو د انسجام مسووليت لري، د شته مالي ظرفيتونو پر بنسټ د کلنۍ بوديجې د ترتيب او مديريت چارې تنظيموي او له منظورۍ وروسته يې د ټاکلي پلان مطابق پلي کوي.
دغه معاونيت د حوالو، معاشاتو، پېر او پلور، لګښتي فورمونو، قراردادونو او حسابي چارو پر بهير مستقيم نظارت کوي او ډاډ ترلاسه کوي چې ټول مالي اجراات د قوانينو او اصولو سره سم ترسره شي، همدارنګه، د مالياتي اظهارنامو د ترتيب او د مالياتو د انتقال بهير ارزوي.
اداري او مالي معاونيت د پوهنتون دننه او له بهرنیو مراجعو سره د بوديجوي او حسابي موضوعاتو په اړه همغږي رامنځته کوي، د اداري کارکوونکو د تقرر، ترفيع او انفکاک په اړه وړانديزونه چمتو کوي او د اړوندو قانوني پروسو تطبيق تنظيموي، دغه راز، د ودانيو، شتمنيو او عامه ملکيتونو ساتنه، د شنو ساحو مراقبت او د دارايۍ قانوني خوندیتوب هم د همدې دفتر له اساسي مسووليتونو څخه دي.
دا معاونيت کلنی کاري راپور برابروي، د لنډمهالو او پنځه کلنو بودجوي او بشري اړتياوو ارزونه ترسره کوي او د اداري شورا د پرېکړو د تطبيق څارنه کوي، څو د پوهنتون اداري بهير په منظم، شفاف او اغېزناک ډول پر مخ ولاړ شي.
په ټوله کې، اداري او مالي معاونيت د پوهنتون د ثبات، شفافيت او مؤثر مديريت تضمينوونکی بنسټ دی چې د منظم پلان، حساب ورکولو او مسوولانه رهبرۍ له لارې د علمي بهير لپاره مناسب اداري او مالي چاپېريال برابروي.