اداري شورا
د ملي پوهنتون اداري شورا د دې
پوهنتون د مالي او اداري چارو د مرستیال تر ریاست لاندې رامنځته شوې ده او د
اجرایي چارو د اغېزمن تنظیم، د سرچینو د سم مدیریت، د علمي فعالیتونو د پرمخ بېولو
لپاره د اسانتیاوو د برابرولو او د پوهنتون د شتمنیو د ساتنې او مراقبت په موخه
فعالیت کوي. د دې شورا پرېکړې د پوهنتون د رئیس له تأیید وروسته اجرایي بڼه خپلوي
او د تطبیق لپاره اړوندو مراجعو ته ابلاغ کېږي.
د ملي پوهنتون د اداري شورا په ترکیب
کې د مالي او اداري چارو مرستیال د رئیس په توګه، د مالي چارو آمر، د خدماتو مدیر،
د نشراتو آمر، د کتابتون مدیر، د حفظ او مراقبت مدیر، د ډیپو مدیر او
همدارنګه د هغو اداري واحدونو عمومي مدیران شامل دي چې د پوهنتون د مرستیالانو تر
نظر لاندې فعالیت کوي. دا جوړښت د بېلابېلو اداري برخو ترمنځ همغږي پیاوړې کوي او
د داخلي چارو د اغېزناک مدیریت زمینه برابروي.
د اداري شورا له اساسي مسؤلیتونو څخه:
د مالي او حسابي چارو اړوند ستونزو ارزونه او حل، د خدماتي او اداري وضعیت د ښهوالي
لپاره لازم تدابیر نیول، او د علمي فعالیتونو لپاره د مناسب چاپېریال برابرول دي.
همدارنګه، دا شورا د نظم، پاکۍ، سمسورتيا او د پوهنتون په چاپېریال کې د خوندي او
ارام فضا په رامنځته کولو کې مهم رول لري.
سربېره پر دې، اداري شورا د لګښتي
بوديجې د ارزونې او تنظیم، د فزیکي امنیت د تأمین په اړه د لازم تصمیم نیولو، او د
اداري پروګرامونو د طرح او تطبیق له لارې د اداري سیستم د موثريت د لوړولو
صلاحیت هم لري. همدارنګه، هغه نور موضوعات چې د شرایطو له مخې عاجلو او اغېزمنو
پرېکړو ته اړتیا ولري، په دې شورا کې مطرح کېږي او په اړه یې لازم تصمیم نیول کېږي.