اُمنا هیئت
اُمنا هیئت د پوهنتون له تر ټولو لوړو رهبري
ارکانو څخه ګڼل کېږي، چې د عمومي ستراتیژیک لوري ټاکلو، اغېزمنې څارنې او د شفافیت
او حسابورکونې د تضمین په برخه کې بنسټیز رول لري، دا هیئت د یو نظارتي او تأییدي مرجع په توګه مسؤلیت لري، څو د
ستراتیژیکو پرېکړو په کولو
او د چارو له هر اړخیزې ارزونې سره، د تحصیلي بنسټ
د ودې، پراختیا او پایښت زمینه برابره کړي.
اُمنا هیئت د لويو ستراتیژیو پر ټاکلو تمرکز لري او د پوهنتون ستراتیژیک، مالي،
کاري او عملیاتي پلانونه ارزوي او تصویبوي، پر دې سربېره، د هغوی پر اغېزناک
تطبیق څارنه هم کوي، دارنګه دا هیئت د
اداري نظم د تأمین په موخه، داخلي ګومارنې،
اداري اسناد، تشکیلات او جوړښت ارزوي او له دقیقې کتنې وروسته یې تأییدوي.
په مالي برخه کې، اُمنا هیئت د کلنۍ بودجې د ارزونې، تصویب او څارنې مهم رول لري او د
عوایدو د راټولولو او مصرف څرنګوالی ټاکي، د مالي او معاملاتي اسنادو تصویب، د حقالتدریس، حقالتحقیق
او حقالتألیف ټاکل او د علمي او اداري کارکوونکو لپاره د امتیازاتو وړاندیز او
تصویب د دې هیئت له مهمو صلاحیتونو څخه دي.
د بشري سرچینو په برخه کې، هیئت امنا
د علمي کادرونو او اداري کارکوونکو د استخدام اړوند مقررات تصویبوي او د پوهنتون د
عمومي رئیس او مرستیالانو ټاکنه تأییدوي،
سربېره پر دې، دا هیئت د علمي، اداري او ستراتیژیکو څېړنو او ارزونو له لارې، د
چارو د کیفیت د ښه والي او مهمو پرېکړو په نیولو کې فعاله ونډه لري.
دا راز، اُمنا
هیئت د تصویب شویو ستراتیژیو او
پروګرامونو پر تطبیق څارنه کوي او د پوهنتون د بېلابېلو برخو فعالیتونه په منظم
ډول ارزوي، له بلې خوا، د پروګرامونو د تطبیق
لپاره د مالي سرچینو برابرول او د بهرنیو سرچينو جلبول هم د دې هیئت له دندو څخه دي.
په ټوله کې، اُمنا هیئت د خپلو مسؤلیتونو او قانوني صلاحیتونو په ترسره کولو سره،
د کیفیت د تضمین، شفافیت د پیاوړتیا او د پوهنتون د ستراتیژیکو موخو د تحقق په
برخه کې یو حیاتي او ټاکونکی رول لري.
د پوهنتون د اُمنا هیئت غونډې په منظم او هدفمند ډول ترسره کېږي. دا هیئت په هر
تعلیمي کال کې دوه عادي غونډې، د هر سمستر په پای کې، دایروي چې پکې د پالیسیو، پلانونو، بوديجې، کړنو او نورو مهمو موضوعاتو
ارزونه او پرېکړې کېږي،
سربېره پر دې، په بیړنیو حالاتو کې فوقالعاده غونډې هم ترسره کېږي، چې د پوهنتون
د رئیس، د هیئت امنا د رئیس یا لږ تر لږه د غړو د یو پر درېیمه برخه په غوښتنه
رابلل کېدای شي، دا منظم او انعطافمن جوړښت د پر وخت
پرېکړو، اغېزناکې څارنې او اغېزناک مدیریت زمینه
برابروي.