د مشرتابه شورا

د ملي پوهنتون د فعالیتونو د پراخېدو او د ټولنې د بدلونونو په رڼا کې، په ځانګړي ډول د کار بازار د اړتیاوو د زیاتوالي او د لوړو زده‌کړو په ملي، سیمه‌ییزه او نړۍواله کچه د کیفي سیالیو د ډېرېدو له امله، د اجرایي چارو د مدیریت او انسجام لپاره د یو منظم جوړښت رامنځته کول یوه اساسي اړتیا بلل کېږي، په همدې چوکاټ کې، د رهبري شورا د ملي پوهنتون د مهمې شورا په توګه رامنځته شوې، څو د مدیریت، همغږۍ او د مهمو اداري پرېکړو بهیر په اغېزناک ډول تنظیم او رهبري کړي.

د ملي پوهنتون د رهبري شورا د پوهنتون د رئیس په مشري فعالیت کوي، چې په ترکیب کې یې علمي مرستیال، د محصلانو چارو مرستیال، د مالي او اداري چارو مرستیال، د تحقیق او علمي مجلې رئیس او د پوهنځیو رئیسان شامل دي. دا جوړښت د پوهنتون د بېلابېلو برخو ترمنځ د همغږۍ لپاره مناسب بستر برابروي او د اداري پرېکړو د بهیر په چټکتیا او ښه‌والي کې مرسته کوي.

د رهبري شورا له مهمو صلاحیتونو څخه: د لویو اداري پروګرامونو په تطبیق کې همغږي رامنځته کول، د مدیریتي کړنو د ښه‌والي لپاره لازم تدابیر نیول، د حمایوي او اجرایي چارو اړوند موضوعاتو ارزونه او د اداري مسایلو حل ته رسېدنه یادولی شو. همدارنګه، دا شورا د شته ستونزو په ارزونه، د عملي حللارو په وړاندې کولو او د مناسبې پرېکړې په نیولو سره د پوهنتون د اداري سیستم د اغېزمنتیا په لوړولو کې مهم رول لري.

سربېره پر دې، د غیر اکاډمیکو موضوعاتو لکه د استادانو او کارکوونکو د شکایتونو څېړنه، د کاري چاپېریال ښه‌والی او نور اړوند اداري مسایل هم د دې شورا د صلاحیتونو په چوکاټ کې راځي. همدارنګه، هغه موضوعات چې د وخت شرایطو او سازماني اړتیاوو ته په کتو د رهبري په کچه پرېکړې ته اړتیا لري، په همدې شورا کې مطرح او ارزول کېږي.

د ملي پوهنتون د رهبري شورا پرېکړې په رسمي ډول ثبت او مستندسازي کېږي او د تطبیق لپاره اړوندو مراجعو ته ابلاغ کېږي، څو د اداري مدیریت په برخه کې شفافیت، ځواب‌ویونه او اغېزمنتیا تأمین شي.