د محصلانو چارو معاونيت په اړه
د لوړو زدهکړو وزارت د مقرراتو او معيارونو له مخې، د محصلانو اړوند چارې بايد په منظم، شفاف او ځوابويونکي ډول تنظيم شي، په همدې موخه، د محصلانو چارو معاونيت د پوهنتون له اساسي اداري واحدونو څخه دی چې د محصلانو د چارو رهبري او مديريت پر غاړه لري او د تدريس بهير د علمي تقويم له مخې څاري.
د محصلانو چارو مرستيال د پوهنتون د رهبرۍ مهم غړی دی چې د محصلانو د شموليت، ثبت، دوسيو تنظيم، شکايتونو ته رسېدنې، د صنفونو تنظيم او د سمستر او کانکور ازموينو د بهير د تنظيم مسووليت لري، دا معاونيت غواړي هڅه کوي په دې ډاډه شي چې ټولې چارې د نافذه لوایحو، طرزالعملونو او علمي تقويم سره سم پر مخ ولاړې شي.
دا دفتر د علمي تقويم طرح او له منظورۍ وروسته يې تطبيق ته ژمن دی، د امتحاناتو بهير څاري، د وېشپاڼو تطبيق کنټرولوي او د امتحاني کمېټو مشري پر غاړه لري، همدارنګه، د تصديقپاڼو، ټرانسکرېپټونو، د نتايجو اعلان، د محصل پېژندپاڼو وېش او د محصلانو د اسنادو ساتنه او آرشيف تنظيموي.
د محصلانو چارو معاونيت د نظم او دسپلين، فرهنګي او امتحاني کمېټو مشري کوي، د محصلانو د شموليت، تأجيل، تبديلۍ او اړوندو اسنادو بهير څاري او د سپورتي او فرهنګي فعاليتونو لپاره زمينه برابروي. سربېره پر دې، د محصلانو اړوند احصايه او راپورونه ترتيبوي او د پوهنتون رهبرۍ او علمي شورا ته يې وړاندې کوي.
په ټوله کې، د محصلانو چارو معاونيت د محصلمحوره مديريت بنسټ دی چې د منظم پلان، رڼو اجرااتو او اغېزناک نظارت له لارې د محصلانو د حقونو خونديتوب او د علمي بهير منظم تطبيق تضمينوي.