په اړه
پېژندنه
په معاصره نړۍ کې حقوق او سیاسي علوم د يوې اکاډميکې څانګې تر څنګ، د عدالت د تأمین، د قانون د حاکمیت د پیاوړتیا او د ټولنو د دوامدار پرمختګ لپاره حیاتي وسایل ګڼل کېږي. د حقوقو او سیاسي علومو پوهنځی د هېواد له مخکښو علمي بنسټونو څخه دی، چې د حقوقي متخصصانو، سیاسي شنونکو او د راتلونکي سیاست جوړوونکو په روزنه کې مهم رول لري. ملي پوهنتون ژمن دی چې د باکیفیته زدهکړو، علمي څېړنو او په ټولنیزو بهیرونو کې د فعالې ونډې اخیستنې له لارې د عدالت او ښې حکومتولۍ د تحقق لپاره اغېزناک ګامونه پورته کړي.
د حقوقي، سیاسي او نړیوالو بدلونونو د چټک پرمختګ له امله، د راتلونکو پنځو کلونو لپاره د یوه هراړخیز ستراتیژیک پلان جوړول یوه مهمه اړتیا ده. دغه پلان د موجود وضعیت د دقیق تحلیل، د فرصتونو او ننګونو د پېژندنې او د ښوونیزو او څېړنیزو اړتیاوو د ارزونې پر بنسټ ترتیب شوی دی. د دې پلان اساسي موخه د داسې اغېزناک چوکاټ رامنځته کول دي چې د علمي کچې د لوړولو، د تدریسي او څېړنیزو ظرفیتونو د پیاوړتیا او د ملي او نړیوالو معیارونو له مخې د ښوونیزو پروګرامونو د ښه والي زمینه برابره کړي.
د دغو موخو د تحقق لپاره د تدریس د طریقو پر ښهوالي، د درسي نصاب پر بیاکتنې او نويکولو، د محصلانو د عملي مهارتونو پر پیاوړتیا او په تدریس او څېړنو کې د نوې ټکنالوژۍ پر کارونې ځانګړی تمرکز شوی دی. سربېره پر دې، د حقوقو او سیاسي علومو په بېلابېلو برخو کې د علمي څېړنو پراختیا، د مجهزو څېړنیزو مرکزونو جوړول، د علمي کنفرانسونو او سیمینارونو ترسره کول او د علمي مقالو د خپرولو دودول د دې پلان له مهمو لومړیتوبونو څخه شمېرل کېږي.
دغه پلان همدارنګه د ښوونیزو زېربناوو پر پیاوړتیا او د محصلانو لپاره د عملي فرصتونو پر برابرولو ټینګار کوي، څو هغوی وکولای شي خپله نظري پوهه په واقعي چاپېریال کې عملي کړي. له بلې خوا، د تحصیلي بنسټونو او دولتي ادارو، نړیوالو سازمانونو، مدني بنسټونو او څېړنیزو مرکزونو ترمنځ د اغېزناکو اړیکو رامنځته کول به د محصلانو لپاره د تجربې ترلاسه کولو او د هېواد د حقوقي او سیاسي ستونزو په حل کې د هغوی د فعالې ونډې اخیستنې زمینه برابره کړي.
په پای کې، دغه ستراتیژیک پلان د روڼتیا، حسابورکونې او پایښت پر اصولو ولاړ دی او د استادانو، محصلانو او اړوندو بنسټونو پراخې همکارۍ او ګډون ته اړتیا لري. هیله ده چې د دې پلان په بریالۍ پلي کېدو سره د حقوقو او سیاسي علومو پوهنځی د زدهکړو د کیفیت په لوړولو، د علمي څېړنو په پراختیا او د قانون د حاکمیت په پیاوړتیا کې لا اغېزناک رول ولوبوي او د عدالت او ټولنیزې هوساینې د تأمین لپاره ارزښتناک ګامونه پورته کړي.
ملي پوهنتون د (۳۸۷) ګڼه رسمي جواز له مخې د ۱۳۹۱ هـ.ش کال د وږي په ۲۱مه نېټه د «ملي» په نوم تأسیس شوه او د یوه خصوصي تحصیلي بنسټ په توګه یې په درېیو څانګو کې خپل فعالیت پیل کړ.
د ملي پوهنتون د حقوقو او سیاسي علومو پوهنځی د تأسیس له لومړۍ ورځې راهیسې د پوهنتون په چوکاټ کې د دوو ډیپارټمنټونو له لارې علمي خدمتونه وړاندې کوي. دغه پوهنځی نه یوازې دا چې د هېواد او ولس د خدمت لپاره د متخصص بشري ځواک د روزنې مسؤلیت پر مخ وړي، بلکې د هېواد د راتلونکو نسلونو د ودې، وړتیا لوړونې او استعدادونو د غوړېدو لپاره یې هم مناسب علمي چاپېریال برابر کړی دی. نوموړي پوهنځي په دې برخه کې خپل علمي، ملي او اسلامي رسالت ادا کړی او لا هم یې په دوامداره توګه پر مخ وړي.
د بااستعداده، ژمن، پوه او مسلکي محصلانو روزنه د دغه پوهنځي له اساسي لومړیتوبونو څخه ده. تر اوسه پورې د قضا او څارنوالۍ ډیپارټمنټ پنځلس دورې او د ادارې او ډیپلوماسۍ ډیپارټمنټ اووه دورې فارغان، له نارینه او ښځینه محصلانو څخه، ټولنې ته د خدمت لپاره وړاندې کړي دي.
په ۱۴۰۳ هـ.ش کال کې د ادارې او ډیپلوماسۍ ډیپارټمنټ نوم د «نړیوالو اړیکو» او د قضا او څارنوالۍ ډیپارټمنټ نوم د «حقوقو» په ډیپارټمنټ بدل شو.
دغه پوهنځی دا مهال دوه فارغورکوونکي ډیپارټمنټونه او یو غیر فارغورکوونکی ډیپارټمنټ لري، چې د علمي او ښوونیزو موخو د تحقق لپاره فعالیت کوي.
ارزښتونه
د حقوقو او سیاسي علومو پوهنځي ستراتیژیکې موخې