د ملي علمي - څېړنیز ژورنال نوې ګڼه چاپ شوه.

د ملي پوهنتون د علمي او څېړنیزو فعالیتونو په لړ کې، د ملي علمي څېړنیز ژورنال د دويم کال درېيمه ګڼه تازه چاپ او خپره شوه، چې د «په افغانستان کې د درملو منطقي کارونې او راتلونکي ليدلوري» تر سرلیک لاندې جوړ شوي علمي کنفرانس مقالو ته ځانګړې شوې ده.

په دې ګڼه کې د هېواد د بېلابېلو علمي بنسټونو د استادانو او څېړونکو علمي مقالې ځای پر ځای شوې دي، چې په‌کې د درملو د معقول استعمال، روغتیايي خدمتونو د ښه والي او د راتلونکو پاليسيو اړوند مهمې علمي څېړنې او تحلیلي لیدلوري وړاندې شوي دي.