د ملي پوهنتون او لايف پرل د درملو توليدي فابريکې ترمنځ د ګډو همکاريو پوهاوليک لاسليک شو.

دغه پوهاوليک چې د لایف پرل تولیدي فابریکې په دفتر کې لاسلیک شو، په کې د ملي پوهنتون د حقوقي او ټولنیزو چارو سلاکار مولوي سیدالرحمن احساس او د څېړنو او علمي مجلې رییس عزیز احمد فضلي هم شتون لاره.

 د پوهاوليک د لاسلیک پر مهال د ملي پوهنتون رییس پوهندوی خالد احمد حبیب وویل چې دا تړون به د په ملي پوهنتون کې د تازه ایجاد شوي فارمسي پوهنځي محصلانو او استادانو ته د عملی کارونو، عملی درسونو او لابراتواري تجربو لپاره خورا ګټور او اغېزناک وي.

 د نوموړي په خبره، له بل اړخه به دا کار د ملي پوهنتون فارمسي پوهنځي استادانو او محصلانو ته د عملي کار، ظرفيت‌لوړونې او لابراتواري تجربو  تر څنګ د علمي څېړنو او ګډو همکاريو زمینه هم برابره کړي.

 ورته مهال د لایف پرل درملو جوړولو فابریکي مشر حاجي احمدالله کوچي د ملي پوهنتون وروستي پرمختګونه او هلې ځلې وستایلې او ژمنه یې وکړه چې د دوی ټول وسایل به د پوهنتون په خدمت کې وي.

 ښاغلي کوچي زیاته کړه چې دوی د درملو جوړولو ډېر مجرب او متخصص کادرونه لري، چې په خبره يې له ملي پوهنتون سره به په تحقیقي، علمي، نظري او عملي تدریسي چارو کې هم اوږه په اوږه کار وکړي.

 لایف پرل د درملو د توليد هغه باکیفیته فابریکه ده چې د هېواد پر ګوټ ګوټ سربېره، نړۍ ته د درملو د صادرولو وړتیا او جواز لري او سلګونه قلمه تولیدشوي درمل یې دا مهال د درملو په بازارونو کې ښه مارکیټ لري.