د عامه پوهاوي په موخه، د ملي پوهنتون له لورې یو ورځنی علمي کنفرانس وړاندې شو.

د ملي پوهنتون له لوري د عامه پوهاوي په موخه، يوورځنی علمي کنفرانس جوړ شو، چې د اداري فساد پر وړاندې مبارزه، د ژوند چاپېريال ساتنه او د نشه‌يي توکو د کارونې زيانونه يې د بحث اساسي موضوعات وو.

د کنفرانس پرانيسته د ملي پوهنتون رييس، پوهندوی خالد احمد حبيب، په وينا وشوه، نوموړي د ټاکل شويو موضوعاتو ارزښت ته په اشارې وويل، چې اداري فساد، چاپېريالي ستونزې او د نشه‌يي توکو کارونه هغه جدي ننګونې دي چې د ټولنې پر راتلونکې ژور اغېز لري او علمي بنسټونه بايد د عامه پوهاوي، څېړنې او حل‌لارو وړاندې کولو په برخه کې خپل مسووليت ادا کړي، نوموړي د ملي پوهنتون پر علمي ظرفيت باور وښود او زياته يې کړه، چې د درملو په تړاو له ملي کنفرانس وروسته د استادانو او علمي کادر لوړ مورال، د لا اغېزناکو علمي پروګرامونو لپاره زمينه برابره کړې ده.

 ورپسې، د حقوقو او سياسي علومو پوهنځي استاد، عبدالحق عابد، د اداري فساد د مختلفو اړخونو تر سرليک لاندې خپله علمي ارايه وړاندې کړه، نوموړي د اداري فساد حقوقي، ټولنيز او اداري ابعاد وڅېړل او زياته يې کړه، چې د فساد پر وړاندې مبارزه کې، د قانون پر تطبيق سربېره، شفافيت، حساب‌ورکونه او عامه پوهاوی هم اساسي رول لري.

 د معالجوي طب پوهنځي استاد، ډاکتر ذبيح الله صالح، د ژوند چاپېريال ساتنې پر وړاندې د وګړو د مسووليت په اړه پرېزېنټېشن وړاندې کړ، هغه د چاپېريال ککړتيا، د طبيعي سرچينو ناسمه کارونه او د روغتيايي ستونزو ترمنځ اړيکې روښانه کړې، ښاغلي صالح ټينګار وکړ، چې د چاپېريال د ساتنې په برخه کې د ټولنې هر وګړی مسووليت لري.

 درېيم وړاندې‌کوونکی، د حقوقو او سياسي علومو پوهنځي بل استاد، حميد الله نايل، د نشه‌يي توکو د کارونې د زيانونو په اړه خپله علمي ارايه وکړه، نوموړي د نشه‌يي توکو ناوړه اغېزې پر فرد، کورنۍ او ټولنه تشريح کړې او ويې ويل، چې د دې پديدې پر وړاندې مبارزه ګډو هڅو، پوهاوي او جدي قانوني تدابيرو ته اړتيا لري.

 د کنفرانس په پای کې، د علمي چارو مرستيال، محمد حنيف معاذ، ياد کنفرانس مثبت وارزاوه او د استادانو علمي پرېزېنټېشنونه او هڅې يې وستايلې، نوموړي له ګډون‌والو مننه وکړه او څرګنده يې کړه، چې دا ډول علمي کنفرانسونه د پوهنتون د علمي ودې او ټولنيز اغېز لپاره ارزښتمن دي.