لیتیوم؛ د افغانستان د بهرني سیاست نوی ستراتیژیک فرصت علمي - څېړنیز سیمینار وړاندې شو.

د بهرنیو چارو وزارت د ډېپلوماسۍ انستیتیوت په کوربه‌توب علمي ـ څېړنیز سیمینار جوړ شو، چې د ستراتیژیکو طبیعي زېرمو او بهرني سیاست ترمنځ اړیکې په کې وڅېړل شوې او د ملي پوهنتون د څېړنې او علمي مجلې د رئیس، عزیزاحمد فضلي له لوري وړاندې شو

.یاد سیمینار د «لیتیومو نړیوال جذابیت او د افغانستان د بهرني سیاست ستراتیژیک فرصتونه» تر عنوان لاندې جوړ شوی و، چې په کې د ملي پوهنتون عمومي رئیس پوهندوی خالد احمد حبیب، د بهرنیو چارو وزارت د ډېپلوماسۍ انستیتیوت عمومي رئیس مفتی نورالله عزام، د یاد انستیتیوت د علمي چارو مرستیال پوهنمل عبیدالله اخندزاده، د بهرنیو چارو وزارت د بېلابېلو ریاستونو کارکوونکو، د پوهنتون استادنو او ګڼ شمېر علمي - مسلکي څېرو ګډون درلود.

په سیمینار کې ښاغلي فضلي د لیتیمو نړۍوال اهمیت، د انرژۍ د نوې معادلې په رامنځته کېدو کې د دغه ستراتیژیک عنصر رول او د نړۍوالو قدرتونو ترمنځ د سیالۍ نوي ابعاد په تحلیلي بڼه تشریح کړل، نوموړي څرګنده کړه، چې لیتیم د پاکې انرژۍ د تحول او د معاصرو ټکنالوژیو د پرمختګ یو اساسي عنصر دی، چې د نړیوال اقتصاد او سیاست په بدلېدونکي جوړښت کې ځانګړی ځای لري.

نوموړي ټینګار وکړ، چې افغانستان د پام وړ لیتیمي زېرمو په لرلو سره کولای شي، د متوازن او فعال بهرني سیاست له لارې د سیمه‌ییزو او نړیوالو همکاریو لپاره نوې زمینې برابرې کړي، د هغه په وینا، د طبیعي زېرمو اغېزمن مدیریت، د علمي شواهدو پر بنسټ پالیسۍ جوړونه، د اقتصادي ډېپلوماسۍ پیاوړتیا او د انرژۍ ډېپلوماسۍ پراختیا کولای شي، افغانستان د سیمه‌ییز اتصال، اقتصادي ودې او نړیوال تعامل په مهم محور بدل کړي.

د سیمینار په پای کې ګډون‌والو د موضوع اړوند خپل نظرونه او پوښتنې شریکې کړې او دا ډول علمي بحثونه یې ارزښتناک وبلل.