د درملو په تړاو د ملي کنفرانس بريا ونمانځل شوه.

د (درملو منطقي کارونه او راتلونکی ليدلوری) ملي علمي - څېړڼيز کنفرانس د بريا نمانځنې دې مراسمو کې، د ملي پوهنتون بنسټګر الحاج عيارالحق شمس، د امنا هيئت غړی پوهاند نقيب الله سهاک، د ملي پوهنتون رييس پوهندوی خالد احمد حبيب او د پوهنتون ګڼ‌ شمېر علمي او اداري منسوبينو ګډون کړی و.

د ملي پوهنتون رييس، پوهندوی خالد احمد حبيب په خپله وينا کې، د کنفرانس برياليتوب وستايه او دا يې د ملي پوهنتون د علمي ظرفيت، منظم مديريت او د هېواد په کچه د باور وړ علمي رول له امله وبلل، نوموړي د کارکوونکو علمي او اداري هڅې وستايلې او هيله يې وښوده، چې دا کنفرانس به د ملي د نوم د تشهير او علمي اعتبار د لا پياوړتيا لامل شي.

وروسته د څېړنې او علمي مجلې رييس، عزيز احمد فضلي د کنفرانس لنډ راپور وړاندې کړ او د کنفرانس علمي لاسته‌راوړنې، مديريتي بهير او لاسته‌راغلې پايلې يې له ګډون‌والو سره شريکې کړې، نوموړي د ګزارش په يوه څنډه کې د څېړنيزو مقالو د غوراوي پروسه، نشراتي بهير او مالي جزيات هم يو په يو يادې کړې.

د ملي پوهنتون بنسټګر الحاج عيارالحق شمس په خپله هڅوونکې وينا کې د څېړنې او ګډ کار پر ارزښت خبرې وکړې او د پوهنتون له رهبرۍ او منسوبينو يې وغوښتل چې د علمي نوښتونو او ملي مسؤليتونو په ترسره کولو کې لا کارنده رول ولوبوي، نوموړي هیله وښوده، چې د دغه شان مهمو او حياتي موضوعاتو په تړاو د برنامو لړۍ دې نوره هم چټکه شي.

په پای کې د ملي پوهنتون د ټولو منسوبينو د هڅونې او نازولو په پار، همکارانو ته ډالۍ ووېشل شوې.