د ملي پوهنتون د علمي شورا میاشتنی ناسته وشوه.

د ملي پوهنتون د علمي شورا میاشتنی ناسته، د ملي پوهنتون د رییس، پوهندوی خالد احمد حبیب په مشرۍ ترسره شوه، چې په‌کې پر ګڼو مهمو علمي، تدریسي او اداري موضوعاتو بحث او د نظرونو تبادله وشوه.

 په پیل کې د محصلانو د ستاژ او سکل راپور او ورسره اړوند موضوعات په تفصیل وڅېړل شول، د شورا غړو ټینګار وکړ چې د دغو دورو کیفیت باید تل په لومړیتوب کې وي، څو محصلان د عملي مهارتونو او کاري تجربې له اړخه لا بډای شي.

 له مهمو موضوعاتو څخه یوه هم د محصلانو د ظرفیت‌لوړونې د عملیاتي پلان ارزونه او تصویب و، دا پلان بېلابېل درسي او عملي پروګرامونه لري، چې موخه یې د محصلانو د علمي او مسلکي وړتیاوو لوړول دي، همدارنګه د فارمسي پوهنځي نصاب تر بحث لاندې ونیول شو، غړو خپلې رغوونکې نظریې وړاندې کړې، څو د دې نوي پوهنځي د نصاب د علمي اړتیاوو او د بازار له غوښتنو سره سم وروزل شي.

 د ناستې په دوام کې د ملي پوهنتون د راتلونکي ملي علمي - څېړنيز کنفرانس (په افغانستان کې د درملو معقوله کارونه او راتلونکی ليدلوری) لپاره د چمتووالی او اړوند ترسره‌شوي فعالیتونه وارزول شول، همدارنګه پرېکړه وشوه چې د مقالو د سپارلو نېټه دې وغځول شي، تر څو څېړونکو او استادانو لپاره د ګډون فرصت لا ډېر شي.

 سربېره پر دې، د اداري شورا کړنلاره، د ارتقای کيفيت آمریت د لومړۍ ربعي راپور، له موسسې څخه پوهنتون ته د نوم پر اوښتو، د فارمسي، ستوماتولوژۍ، حقوقو او سیاسي علومو پوهنځیو د بستونو په اړه د تقرر او ترفیعاتو د علمي کمیټې پرېکړه او همدارنګه د نوي سمستر په پیل کې د محصلانو د ټولګیو ارزونه مطرح او تصویب شوه.