د علمي شوری مياشتنه ناسته وشوه.

د ملي پوهنتون د وږي (سنبلې) مياشتې د علمي شوری ناسته د پوهنتون د رييس پوهندوی خالد احمد حبيب په مشرۍ وشوه، چې په ترڅ کې يې پر يو لړ مهم موضوعاتو بحث او پرېکړې وشوې.

 د لومړي بحث په توګه د اميرالمومنين د فرامينو او د نظام د تګلارو د پوهاوي کړنلاره وڅېړل شوه او پرېکړه وشوه چې د پوهنتون په ټولو پوهنځيو او اکاډميکو برخو کې دې د پوهاوي او د عامه ذهنیت لوړولو لپاره ځانګړي پروګرامونه تطبیق شي، ورپسې د شکايتونو د صندوقونو د پرانېستو طرزالعمل مطرح شو، څو په دې برخه کې د يوه منظم ميکانيزم له رامنځ‌ته‌کېدو سره د شفافيت، همکارۍ او همغږۍ فضا نوره هم پياوړې شي.

 د خزاني سمستر د شل فيصده آزموينو په اړه هم مفصل بحث وشو، د علمي شوری غړو د دې آزموينو د ښه تنظيم او د محصلانو د علمي سطحې د کره ارزونې پر اړتيا ټينګار وکړ، د پوهنتون رييس ښاغلي حبيب اړونده کمېټې ته دنده وسپارله، چې له مهال‌وېش سره سم د آزموينو د ترسره کولو لپاره بشپړ چمتووالی ونيسي.

 ورپسې جوخت د درملو د منطقي کارونې او راتلونکي ليدلوري په اړه د راتلونکي ملي علمي - څېړنيز کنفرانس د تاييد شويو مقالو په اړه هم بحث وشو او پرېکړه وشوه چې څېړنیزو معيارونو ته په پام دې کنفرانس لپاره ارزښتمنه منځ‌پانګه ترتيب او برابر شي.

 د درې‌ګونو پوهنځيو په کچه د استادانو د خودي ارزونې موضوع هم د ناستې مهمه برخه وه، ټینګار وشو چې استادان دې د خپلو علمي او مسلکي فعالیتونو پر بنسټ د ځان ارزونې راپورونه وړاندې کړي څو د تدريس کيفيت د لا ښه کېدو لپاره بنسټيز معلومات برابر شي، ورپسې د معالجوي طب او ستوماتولوژۍ د پوهنځيو د نصاب تعديل تر بحث لاندې راغی، په ورته وخت کې پرېکړه وشوه چې د فارمسي پوهنځي تعديل شوی نصاب دې له نهايي ارزونې وروسته د لوړو زده‌کړو وزارت اړوندو مراجعو ته واستول شي.

 په روغتونونو کې د محصلانو د عملي کارونو ميکانيزم هم د ناستې د اجنډا مهمه برخه وه، د شوری غړو د عملي زده‌کړو پر ارزښت ټینګار وکړ او پرېکړه وشوه چې د محصلانو لپاره د عملي کار واضح چوکاټ او کړنلاره جوړه شي، څو هغوی د نظري زده کړو ترڅنګ د مسلکي تجربې ترلاسه کولو ښه زمینه ولري.

 په پای کې د علمي شوری د غړو له خوا د ټولو موضوعاتو په اړه لازمې پرېکړې او لارښوونې وشوې، څو د پوهنتون د علمي، اداري او تعلیمي چارو د موثريت او پرمختګ لپاره عملي ګامونه واخيستل شي.