د چارو ادارې لوی رئیس د حکومت او وزارتونو په استازیتوب، د ملي علمي ـ څېړنیز کنفرانس له رهبري غړو سره وليدل.

د چارو ادارې لوی رئیس، شیخ نورالحق انور، د اسلامي امارت او اړوندو وزارتونو په استازیتوب د «په افغانستان کې د درملو منطقي استعمال او راتلونکي لیدلوري» تر سرليک لاندې، د ملي پوهنتون له لوري ترسره‌کېدونکي، ملي علمي ـ څېړنیز کنفرانس د رهبري کمېټو له غړو سره ناسته ترسره کړه.

 په دې ناسته کې د ملي پوهنتون رئیس، پوهندوی خالد احمد حبیب، د کنفرانس د رهبري کمېټو د غړو په ملتیا، له ښاغلي انور سره، د کنفرانس علمي موخې، اهمیت، د درملو د معقول استعمال اړتیا، د روغتیايي نظام د پیاوړتیا لارې چارې او د علمي څېړنو پر ارزښت خبرې وکړې.

 ښاغلي حبیب د کنفرانس د علمي جوړښت، د څېړنیزو مقالو د ارزونې میکانېزم، د متخصصینو د ګډون څرنګوالی او د کنفرانس تمه کېدونکې پایلې تشریح کړې او ټینګار یې وکړ، چې دغه کنفرانس د علم، پالیسۍ او عملي تطبیق ترمنځ د اړیکې د پیاوړتیا په موخه جوړېږي.

 شیخ نورالحق انور د حکومت او وزارتونو په استازیتوب د ملي پوهنتون علمي نوښتونه وستایل او د یاد ملي علمي ـ څېړنیز کنفرانس د ملاتړ ډاډ یې ورکړ، نوموړي څرګنده کړه، چې دا ډول ملي علمي کنفرانسونه د حکومتي پالیسۍ د علمي کولو، د بین‌الوزارتي همغږۍ د پیاوړتیا او د عامه روغتیا د ښه‌والي لپاره بنسټیز ارزښت لري.

 په پای کې دواړو لوریو د دوامدارو علمي همکاریو، د څېړنو د ملاتړ او د علمي بنسټونو د پیاوړتیا پر اړتیا ټینګار وکړ.